知戲館館主Blog

Hancock

之前韋史密夫(Will Smith)拍《魔間傳奇》(I Am Legend)飾演一個正氣凜然，誓要搵出治療病毒拯救城市既英雄，面對成千上萬既變種人大家諗若果佢有超人力既話，最後一定係個好既結局。最新由佢主演既科幻動作片《Hancock》，佢終於可以飾演個擁有無窮力量既超人，仲識飛添，但可惜…佢原來係個不修篇幅、乞人僧，仲係按自己諗法想做就做既人，呢D絕對係上天既大整蠱。貫徹韋史密夫風趣幽默既性格，角色可謂係為佢度身訂造，由一個受萬民唾罵既流氓，憑住上天給予既無敵能力，點樣變成拯救洛杉磯市既大英雄。
美國七月上映，電影官網有最新宣傳片睇。

Star Trek

睇到「企業號」既標誌，年紀稍為大D既「後生仔」都一定會記得，曾經陪住佢地長大既一套美國著名電影劇集《星空奇遇記》(Star Trek)。電視連續劇可以拍得家傳戶曉，相互緊扣既故事舖排同埋角色性格獨立清晰係最重要，老戲迷認真有福，明年年中最新同名電影版本將會上映，以前傳方式交待片中出名既宇宙艦「企業號」既誕生，仲有主角洗樸(Spock)及加卡(Kirk)等角色第一次相遇及執行任務，年輕觀眾當新故仔睇又得。電影試片未係有太多野睇，但到官網欣賞一下企業號既宏偉外貌亦無妨。www.startrekmovie.com

功夫之王 The Forbidden Kingdom

當初知道此片取名《功夫之王》，而且仲係當今兩位亞洲武打巨星合演，心諗呢齣一定係兩位既演技加真功夫大比拼，不過睇左電影宣傳片後，我覺得我既想法太膚淺，原來功夫之王係指戲既神髓。集戲中兩位武術高手－李連杰及成龍，傳授百家武術於一身，機緣巧合下由現代一個完全唔識武功既後生仔，去到中國古代為左救出被邪惡Jade Warlord囚禁既Monkey King，所遇到既都與武學有關，直頭係睇緊武功秘笈一樣。中國武術十八般武藝一次過搬上大螢幕，既然搵到兩位巨星演出，武打場面絕對係精心設計黎比兩位盡情發揮，加上濃厚既漫畫分鏡味道，一本精采絕倫既武俠小說完全展現比觀眾。美國4月公映，先到官方網站收看電影宣傳片。

Indiana Jones and the Kingdom of the Crystal Skull

絕對係大片中既大片，奪寶奇兵番黎喇，好似跨張左D，但係當夏利遜福(Harrison Ford)年屆六十都咁有精力去拍，而且部份動作場面更加要求親身上陣時，真係點到你唔佩服佢既專業精神。相隔十九年同一金像導演史提芬史匹堡(Steven Spielberg)，夥拍福伯又加多個人氣急升而且係史匹堡愛將既年青偶像Shia LaBeouf，即電影《變形金剛》個男主角，咁強既卡士唔叫大片真係唔知點形容。全新電腦特技加上名牌好戲演員同埋導演，奇兵系列最新作《Indiana Jones and the Kingdom of the Crystal Skull》好快今年5月全美公映，香港絕對有機會同步上畫。
電影官網 www.indianajones.com 有宣傳片優先欣賞。

夜行悍探 Street Kings

1994年既《生死時速》(Speed)，令奇洛李維斯(Keanu Reeves)登上全美最受歡迎既男動作電影明星，瘋魔萬千影迷。但之後似乎再未見佳作，到《22世紀殺人網絡》(Matrix)系列既上映，又令佢人氣反彈，同樣再之後既幾套電影又未如理想，其實計算一下由1994年開始到2006年，奇洛都已經主演過20套電影，其中票房最好既就係動作片種，唔係話浪漫愛情，抑或合家歡電影片種佢唔適合，但就硬係覺得奇洛應該係一個型仔動作男星。既然係Fans既終於響今年等到由佢主演既動作片《Street Kings》，將會在4月美國上映，劇情講佢飾演一位洛杉磯警探，無辜被捲入謀殺自己妻子既案件之中，最終要洗脫罪名同搵出幕後真兇，卡士都唔差架，有金像獎黑人影帝Forest Whitaker、電視劇House既男主角Hugh Laurie等，值得留意。

Heath Ledger 1979-2008

Heath Ledger:1979-2008　曾主演《斷背山》(Brokeback Mountain)，及今年上映既《蝙蝠俠：黑夜之神》(The Dark Knight)裡面飾演小丑既希夫列達(Heath Ledger)逝世，終年28歲既佢似乎係離世得太早，正值電影生涯開始起步既同時，雖然之前已拍過12部電影作品只係演譯配角戲分，但經05年李安既《斷背山》將佢帶出谷底，演技得到認同時電影劇本亦接踵而來，得到能夠參與票房賣座大片《蝙蝠俠》系列電影，而且仲可以飾演經典靈魂角色小丑，可惜現已成為佢既電影遺作。雖然坊間初步推測佢係濫藥致死，有些則講因為過度投入角色變得性格孤僻，但不論最終原因係點都好，一個有可能成為荷里活演技派既新寵就留響美國電影歷史裡面。

Step Up 2 the Streets

街頭鬥舞Street Dance響外國都興左好耐，傳到黎亞洲最熱既有韓國既B-BOY、日本既Dance Battle，而香港都有好多人玩緊，除左因為有遊戲網絡商推出同類型遊戲外，商場舉行既假日表演亦時常吸引到人潮欣賞。跳舞其實無分國界，一個人跳又得一班人又得，除左能夠表達情感之外，配合音樂既舞動節奏，加入街頭比鬥既切磋舞技形式，電影公司睇到呢類戲種有市場價值，搵埋班又跳得又青春既靚仔靚女主演，所以上集既《舞出真我》(Step Up)在港上映都得到唔錯既票房反應，同樣地即將上映既最新一集《Step Up 2 The Street》，一睇戲名已經話到比觀眾知係玩街舞，今齣主線改到女主角身上，為追求更上一層樓既舞藝，夥拍一齊響跳舞學校訓練既高手，以地下街舞王者榮銜成為佢既鬥舞戰場。美國2月公映，官方宣傳片響 Apple.com

Diary of the Dead

2004年《活死人凶間》(Dawn of the Dead)，2005年《活死人地帶》(Land of the Dead)，呢兩套既導演George Romero今年會帶比大家佢最新既作品－《Diary of the Dead》。欣賞過佢作品既觀眾一係就以為同我地開玩笑，一係就讚佢意念創新，以往我地認識(其實都係由電影或書本等媒體描述)既喪屍，嗜血係佢地既本性，唯一既目的就係周圍食人，佢地既信念就係見人就咬，但由George一手帶出黎既喪屍新形態，有100米選手一樣既跑姿速度、除左掤牙之外懂得使用武器、識得控制自己既地盤階級之分，真係問你死未，若果你係Old School喪屍片既Fans，一定比佢激到心臟病發，但若果你係能夠接受到新事物既一群，又不妨睇下呢套已經係導演第5套既喪屍作品。08年上旬上映。有George亮相既電影官方宣傳片：youtube

蝙蝠俠：黑夜之神 The Dark Knight

黑！戰衣要黑，戰車要黑，戰場係黑夜，就連英文戲名都改成《The Dark Knight》，因為見到佢既標誌，相信冇人唔識佢就係葛咸城既大英雄－《蝙蝠俠：黑夜之神》最新一集既電影中文譯名。好多人都唔明點解又拍多次以宿敵「小丑」(Joker)既橋段，原來今次呢套係由2005年齣《蝙蝠俠：俠影之謎》(Batman Begins)既導演及編劇再次合作，兩人同時覺得當時拍竣蝙蝠俠前傳完成後，故事應該可以延續，而且更想將重要既角色「小丑」重新刻劃得更具原著魅力，當然仲有描寫主角背負父親逝世正義與復仇之間既掙扎，更交代蝙蝠俠與「雙面人」之間既恩怨情仇。大卡士有型男主角Christian Bale外，有扮演小丑既斷背山已故男主角Heath Ledger，其他如Morgan Freeman、Maggie Gyllenhaal等，加上靚景同埋潮型新座駕「Batpod」，要等到7月先有得睇，暫時先到電影官網欣賞最新宣傳片。

100位最性感電影明星

美國權威電影雜誌《Empire》舉辦由讀者選出既100大最性感電影明星，不負眾望亦可以講係非佢莫屬既安祖蓮娜祖莉(Angelina Jolie)，成功登上第一寶座。集性感與及演技於一身既佢，響荷里活既星途上並唔係話一帆風順，出道時只能夠係配角既佢，就算努力演出但未能得到關注，直至2000年開始走性感路線，響《極速六十秒》(Gone in 60 Seconds)夥拍尼古拉斯基治擔正女主角，不論美貌及演技都令觀眾眼前一亮，隨後既代表作《盜墓者羅拉》(Lara Croft: Tomb Raider)系列、《史密夫決戰史密妻》(Mr. & Mrs. Smith)等，能夠響眾多美艷女星如謝茜嘉艾巴(Jessica Alba)、史嘉莉祖安遜(Scarlett Johansson)、姬拉麗莉(Keira Knightley)等手上脫穎而出，足以證明佢響荷里活電影圈既地位。想知道全部100位最性感影星係邊個可到Empire網站。

Hellboy II: The Golden Army

相隔四年，呢隻擁有地獄惡魔力量但又偏喜歡留響人間消滅魔物既地獄男爵，當年在港上映時叫《天魔特攻》(可能覺得直譯地獄男孩太娘)，今次面對新一批貌似日本古代彊屍武士造型既強大軍隊來襲，除一貫有Hardcore既大爆炸力鎗炮、單挑巨大魔獸外，似乎外國電影都鍾意加入功夫場面，呢樣應多謝電影《標殺令》(Kill Bill)既成功，以及一眾東方演員如成龍、李連杰等將功夫格鬥帶入外國電影市場，如電影宣傳片裡面睇到Hellboy都要功夫一番。Hellboy呢個美國漫畫人物在香港未必太多人認識，但亦不失為套製作認真既科幻動作片。美國08年中上映。電影官網有宣傳片及Wallpaper下載：www.hellboymovie.com

Speed Racer

偉大既監製永遠都眼光獨到，拎起手劇本一睇就知有冇叫座力，清楚電影工業市場及觀眾口味既需求，金牌監製Joel Silver賣座既作品有《轟天炮》系列(Lethal Weapon)、《虎膽龍威》系列(Die Hard)等，最出名既就係《廿二世紀殺人網絡》(Matrix Trilogy)。除左有眼光之外，要挑戰一個劇本究竟拍出黎會係點，有冇話題性及題材創意，呢份膽色亦唔係個個監製都得，呢套夢幻喜劇式既《Speed Racer》除左極之漫畫化題材之外，真人加電腦特技既動畫式拍攝方法，構圖畫面色彩絕對令觀眾好似玩緊遊戲機一樣，喜歡呢類片種既不妨留意下，而唯一大家熟識既卡士就只有戲內飾演賽車手既韓國天王Rain啦，要睇既等到08年中美國上映。
電影官網有宣傳片睇：speedracerthemovie.warnerbros.com

﻿知戲館館主Blog