暴走四壯士 Wild Hogs [復制鏈接]

最扮嘢電單車男 笑爆美國開畫票房No.1

四個電單車男，不單成為美國開畫票房冠軍，更榮登史上三月份最高開畫票房電影(非動畫)三甲之一！他們就是：2大金像提名男星尊特拉華達(John Travolta)及威廉麥斯(William Macy)、《好狗先生》添艾倫(Tim Allen)及《重案夢幻組》馬田羅倫斯(Martin Lawrence)。今次四位好戲之人聚頭，合力炮製笑足120分鐘的喜劇，成功笑震全美國。

日日做到冇停手 總有出走o既時候

四個人到中年戇篤篤的男人之虎，日做夜做個個唔係老婆奴就係一條懵佬，忽然想拋開束縛，及時行樂，騎上電單車四處闖蕩，追尋自由奔放。於是四個男人，戴起頭盔，坐上鐵馬，直駛高速公路，奔向理想中的長征。豈料四人先惹得黑幫唔順瞧，再錯手火燒黑幫酒吧，慘被全城追殺；之後，在路旁紮營過夜，被公路巡警當成是露體狂基佬…要大家受埋佢玩蛋蛋！總之保證全程不斷撞板，笑到你眼坦坦。


香港上映日期：6月21日

鳴謝：洲立影片公關部

4條牛扒公路暴走自由行，鑊鑊新鮮鑊鑊甘

第1站：
準備充足：地圖、指南針、衛星導航手機同lap top都通通掉晒，皆因佢哋話旅途要零拘束，好似盲頭烏蠅咁先最舒服！結果發現連電油都冇準備，慘變推車四怒漢！

第2站：
野外露營：為增加兄弟感情，大家決定野外紮營！點知野火會變成惹火會，火燒帳幕，大家成晚冇著落。唯有打大赤膊瞓郊外，點知4隻無辜小雀仔，差啲被筋肉猛男一網打盡…

第3站：
跳舞追女：暴走中坑遇上靚女一見鍾情，打算用精湛舞技令對方傾情。可惜大家都知佢水皮，辣身舞都俾佢跳到變撻身舞，撻到腰都赤。

第4站：
英雄救美：新相識竟然俾□人撩，咁大膽當然要同佢單挑！電腦老神童明明想大顯威風，結果俾人o趙到面瘀眼又腫。

第5站：
終極騎呢大廝殺：四條懵佬撩事鬥非，終於惹著鐵騎黑幫。牙擦擦唔識死都算，仲錯手燒埋人哋間吧，激到對方發出全城追殺令，仲牽連到無辜小鎮陪佢哋受死，今次點收科？